Será o dia 7 de agosto no tanatório Álbia da Corunha a partir das 3 da tarde. Companheiras, camaradas e amizades de Afonso Mendes Souto darám a última despedida a este militante que se foi muito novo e inesperadamente. É a forma de reconhecer o seu contributo à causa galega deste activista de ideário comunista, especialmente ligado com a defesa da língua e o movimento associativo da cidade herculina.
Ricardo Morente e Serxio Moreira farám o seu contributo musical no acto, e as escritoras Pilar Pallarés e Yolanda Castaño intervirám como amigas do finado. O acto contará também com a intervençom de membros da família de Afonso. As e os organizadores pretendem que seja umha homenagem laica a umha pessoa que se esforçou sempre por ‘mudar a realidade e construir de baixo para cima.’
Trajectória e lembranças
Afonso Mendes nascera na Corunha em 1980. Fijo parte dessa geraçom de galegas e galegos que aderírom ao independentismo na viragem de século. Anos de efervescência popular com o movimento Nunca Mais, os protestos contra a LOU e contra a guerra imperialista, além de greves gerais. Nesta conjuntura, centos de moços como Afonso integrárom-se em estruturas independentistas e revolucionárias. No seu caso, fijo-o nas fileiras de NÓS-UP, Briga, Agir e Primeira Linha. Nos tempos mais recentes seguia a fazer parte do CS Gomes Gaioso e da Associaçom de Estudos Galegos. Era docente de língua e literatura galegas e realizava contributos teóricos a estes campos.
Ao longo da semana, sucedêrom-se as condolências e recordos de todo o independentismo organizado, do reitegracionismo, e também de figuras do nacionalismo institucional. Pessoas do mundo da cultura ou Maria Xosé Silvar ‘Ses’, recordárom o contributo de Mendes Souto ao movimento associativo e a diversas causas populares.