Por José Manuel Lopes Gomes /
Onte celebrou-se o Dia do Património Mundial a iniciativa da UNESCO. Na Galiza, a Rede do Património Cultural quijo pôr em destaque a nossa incalculável riqueza milenária, pondo em comum múltiplas iniciativas associativas para celebrar e reivindicar o passado galaico. 39 atos culturais inçam esta semana na geografia do país.
De maneira paralela ao desleixo político, à desruralizaçom ou ao avanço do ‘deserto verde’ do eucaliptal, um poderoso tecido associativo está a desenvolver-se para chamar a atençom sobre o enorme património que, de Ortegal ao Minho e de Fisterra ao Manzanal, ainda é desconhecido para os mais dos galegos e galegas.
Pola primeira vez, este conjunto plural de coletivos decide coordenar-se numha única semana, ponhendo na rua iniciativas para todos os gostos que darám a conhecer arquitetura, paisagem e arqueologia.
As pessoas interessadas podem conhecer a Terra Cha de mao de Xermolos, o coraçom da Galiza graças à Gentalha do Pichel, o románico do nordeste com Amigos de Castro Verde, ou o monte sagrado dos celtas guiado pola Associaçom Monte Pindo.
Som só umha pequena parte de quase quarenta atos, coordenados nas redes sociais através do hashtag #AmigosdoPatrimonio.