Isabel Rei Samartim, música, professora e militante do movimento pola língua vem de editar a sua primeira novela, umha obra escrita em galego internacional que aborda, nas chaves da literatura, algumhas das questons mais prementes que inquietam as pessoas conscienciadas, tais como o futuro da civilizaçom, a língua e os valores. Umha “distopia positiva”, segundo a autora, que giza um outro horizonte possível neste presente de pessimismo e desconcerto.

Isabel Rei é música guitarrista, concertista, doutora em História da Arte e professora no conservatório. Comprometida com a causa da Galiza, com ela mantínhamos neste portal, há uns meses, umha conversa com a língua como centro.

Vinculada com o seu interesse polo idioma, e com a sua sensibilidade polas causas sociais, irrompe a sua primeira criaçom literária, “Galizan Nation. Uma distopia kpop”, umha novela de açom editada por Companha Editora, com elementos de mistério que fala do futuro do país e do mundo. A obra foi apresentada na Livraria Couceiro em Compostela no passado dezembro.

Em tempos onde proliferam recriaçons fantasiosas de futuros sombrios, Rei aposta neste caso por umha “distopia positiva” protagonizada por Ada Estrada, umha heroína que nos conduz por um planeta onde o neoliberalismo ruiu, a mudança climática foi superada e a língua galega goza dum bom estado de saúde. A trama desenvolve-se dentro de 150 anos, e nela aparece a Galiza como centro, mas também Portugal e Espanha. Para a criadora, a situaçom que vivem os três países na fiçom “é bem melhor do que a atual”, sem que por isso a obra poida ser considerada umha utopia “na que tudo é bom”. A aventura desenvolve-se ao longo de mais de 200 páginas, acompanhadas de ilustraçons da artista Íria Ribadomar, e a autora reconhece a sua dívida com elementos da cultura coreana, com a que aparecem certos paralelismos, a começar pola idêntica latitude do planeta na que Coreia e a Galiza se acham.

As pessoas interessadas em conhecer mais detalhes da obra podem fazê-lo nesta entrevista de Isabel Rei com Christian Salles no youtube.