Segundo informa o organismo anti-repressivo Ceivar, o preso e a presa independentista Antom Garcia e Assum Losada venhem de ser transferidos desde a prisom de Teixeiro, nas Marinhas, até a do Pereiro de Aguiar, na comarca de Ourense. O translado dá-se a petiçom da própria Assum Losada, com a intençom de estar mais perto dos seus familiares, sediados em Ourense, e cinco anos depois do ingresso de ambos em prisom.
Assum Losada e Antom Garcia cairam detidos em Vigo em junho de 2019, na mesma operaçom que levava a prisom a Miguel Garcia e Joám Manuel Sanches, estes últimos já em liberdade. Tratou-se da derradeira operaçom contra a resistência galega, e culminou numha condena aos dous primeiros de mais de vinte anos de prisom. O tribunal de excepçom espanhol considerou-nos máximos responsáveis da dinámica de violência política independentista que se produziu no país entre 2005 e 2014.
Após um tempo de dispersom em penais espanhóis, os presos e presas independentistas vírom reconhecido o seu direito a pagar condena perto do domicílio familiar, direito que se efetiva agora mais umha vez com a transferência a um centro perto do entorno familiar de Assum.
Ceivar pede nom esquecer a solidariedade
No seu sítio web, Ceivar facilita o endereço de ambos militantes e chama a manter correspondência na sua longa condena, e recorda que o desafio repressivo do Estado nom cessa. No vindouro 15 de outubro, enfrentarám-se a um novo julgamento que “poderia aumentar o limite máximo da sua estáncia em prisom de 20 para 25 anos”. O organismo anuncia que em poucas semanas iniciará umha campanha solidária.