Alex and Munchie -contra o cisheteropatriarcado-, último video-criaçom/documentário de Carmen Granxeiro e Xácia Ceive é quase umha fantasia, um diálogo ou mais bem um metadiálogo que impulsa a pensar. Desde a cabana-refúgio (é o refúgio para pessoas trans que há na Ribeira Sacra?) até as ruas mais frias de qualquer vila galega. As raposas sobreviventes questionam e questionam-se procurando tender pontes políticas para a construçom de soluçons e de alternativas. O seu principal receitor (?): Um movimento transfeminista afortunadamente amplo, que muites consideramos vangarda da defesa da Vida e da Terra, o movimento transfeminista galego.
Essa fusom que apresentam de ficçom, “loucura” e realidade, é realmente umha aposta artística desafiante e trabalhada mesturando diversas técnicas cinematográficas mas também poéticas e de artes visuais várias.
Viver a exclusom no rural baixo a lua cheia, sentir que a natureza cura mas também a obriga do cuidado atento e lento, construir desde as contradiçons da comunidade e todas as cores que implica a dissidência de género, e considerando a própria animalidade como causa de questionamento e risco de morte.
Alex and Munchie -contra o cisheteropatriarcado- nom é umha paisagem idílica, nem pretende sê-lo, porque tem algo de realismo que sem chegar a ser mágico impregna de sonhos a pantalha cum surriso e as bágoas das protagonistas valentes que aprendem e desaprendem constantemente nos seus pequenos ou grandes enfrontamentos com o mundo existente.