A menos dumha semana da sua posta em circulaçom, o ‘Manifesto de solidariedade co@s 12 independentistas galeg@s processad@s na Audiencia Nacional e coas organizaçons Causa Galiza e Ceivar’ soma já mais de 1000 assinaturas na rede, umha cifra com poucos precedentes quando do que se trata é de apoiar publicamento os e as retaliadas no nosso país.

https://docs.google.com/forms/d/e/1FAIpQLSckyzGqvJN4p81yxo_Jrv8yvq0W_4casupUIG1ZhWCkiNVkmQ/viewform

Além de representantes dum amplo leque de organizaçons nacionais e de esquerdas, políticas ou sectoriais, institucionais ou extra-institucionais, e de reforçar-se com os nomes de internacionalistas de várias naçons (País Basco, Catalunha ou Castela), o manifesto representa umha boa escolma dos distintos sectores da classe trabalhadora galega e do movimento associativo: soldadores e reformadas, mestres e informáticas, estudantes e desempregadas, membros de centros sociais, sindicalistas e activistas culturais, transportistas e advogadas…dum modo ou outro, representantes da Galiza que se move com as causas solidárias, em toda a sua pluralidade etária, social e profissional, está representada até o momento. Se bem som destacados os nomes de chamados ‘persoeiros’, nomes que salientam no seu campo académico ou profissional, o mais chamativo deste caso é a amplitude dos apoios envolvidos, e o peso de trabalhadoras anónimas e comprometidas com os movimentos de base.

Iniciativas

O documento, que se actualiza cada dia com novas adesons, fai parte dumha série de iniciativas solidárias que estám a circular por todo o país nas semanas prévias ao juízo da Operaçom Jaro, tentativa de punir seriamente -com prisom, multas e inabilitaçom- doze activistas envolvidos em Causa Galiza e Ceivar. Por toda a geografia galega estám a funcionar várias assembleias abertas que assinalam na rua a gravidade do que se está a cozer nas altas instáncias político-judiciais do Reino.

Como complemento a esta iniciativa massiva, também várias ex-presas e presos políticos tenhem feito público o seu manifesto solidário, no que exprimem agradecimento pola assistência que, no seu dia, recebêrom da causa anti-repressiva. Recordemos que entre as actividades puníveis pola justiça espanhola acha-se, segundo os instrutores, a participaçom no recebimento de presas e presos.

Para pôr o ramo à agenda de denúncia que estamos a comentar, solidárias e solidários sairám às ruas de Compostela no vindouro dia 18 de outubro em manifestaçom nacional.