Neste 23 de abril cumprem-se cem anos da fundaçom na Corunha das Escolas de Ensino Galego, iniciativa educativa precursora lançada polo galeguismo, e com umha participaçom decisiva de Ángelo Casal e Maria Miramontes. Numha etapa histórica muito distinta, na que o movimento galego recupera a ideia de fundar umha escola nacional, desta volta de mao da Semente, a celebraçom do cem aniversário terá umha dimensom de especial atualidade. Eis algumhas das actividades que a Semente está a argalhar.
O acto terá lugar o 23 de abril a partir das 11 da manhá no lugar mais céntrico da Corunha, a Praça de Maria Pita, e nom muito longe do local que, em 1916, acolhia a fundaçom das Irmandades da Fala, e portanto o nascimento do nacionalismo galego dotado de tal nome. A essa hora, concentrarám-se escolares de várias idades na praça, para assistirem ao começo dum acto que dinamizam Xurxo Souto e Os Quinquilláns.
A seguir, as e os assistentes descobrirám umha praça comemorativa dos cem anos de ensino galego e em galego, que será acompanhada por intervençons políticas e educativas: Santiago Quiroga, coordenador nacional da Semente, interpretará o significado histórico da iniciativa de Casal e Miramontes da perspectiva da construçom atual dumha nova rede educativa autóctone; Gonzalo H. Castro, concelheiro de fomento e promoçom da Corunha, explicará as razons polas quais a cámara municipal apoia a iniciativa; finalmente, Antón Costa, especialista na história da educaçom, fará umha contextualizaçom do projeto de Casal no longo prazo dos grandes processos pedagógicos.
Cántigas da Terra encerrarám os discursos com umha atuaçom musical, e a seguir, as crianças percorrerám a zona velha com um passeio didáctico de mao dos Quinquilláns.
Iniciativas formativas e documentário
Além das actividades do próprio dia, a Semente está a disponibilizar nas redes sociais diversos materiais que ajudarám a dar a conhecer em todo o movimento galego a história da iniciativa educativa irmandinha, ainda mormente ocultada no ensino oficial e ignorada pola sociedade. Nos fragmentos oferecidos, historiadores como Antón Costa ou Uxío Breogán dam algumhas chaves que explicam o abrolhar daquela nova dinámica política e educativa.
Outros investigadores, caso de Xosé Emilio Ínsua, ajudam a entender o nascimento das Escolas do Ensino Galego levando em conta as dinámicas internas do movimento galeguista, na altura, em 1923, enfrentando umha ditadura.
Será o 23 de abril quando a Semente espalhe em vivo por youtube o seu documentário “Aprender na língua própria. Das Escolas de Ensino Galego à Semente”, e que dará ainda umha difusom maior a esta vindicaçom dum sistema educativo de nosso construído pola base.