Nesta semana conhecíamos a notícia da dissoluçom da iniciativa informativa comunitária Galiza Contrainfo, mais umha peça da importante engrenagem de meios autogeridos galegos que nasceram com a popularizaçom de internet no século XXI. Fundamental para dar imagem a iniciativas populares silenciadas, denunciar vulneraçom de direitos ou festejar logros dos movimentos sociais, os centos de videos deste colectivo conformam umha das melhores bases audiovisuais para reconstruir a história de luita da Galiza dos últimos lustros.
Com a assunçom de certo “esgotamento” do projecto, as e os companheiros de Galiza Contrainfo despidem-se do movimento popular pedem “mais vida, mais rua e menos ecrás”, em alusom crítica à excessiva dependência das tecnologias, também nos espaços de luita social.
Nascido no 2008, naquele país agitado por “Galiza nom se vende”, as grandes greves do metal viguês, a repressom “antiterrorista” contra o independentismo, ou a resposta popular ao supremacismo de “Galicia bilingue”, as e os companheiros deste meio registárom mobilizaçons obreiras, gravárom movimentaçons polas selecçons nacionais, recolhêrom em video os anos da grande vaga feminista, e deixárom em video para a posteridade os recebimentos a presos e presas independendentistas, agora proibidos pola justiça espanhola, ou reproduzírom a violência policial no despejo de centros sociais como o Escárnio. Videos como estes, de enorme impacto, achegárom-se ao milhom de visitas.
Os seus e suas jornalistas padecêrom em ocasions pressom das forças de ocupaçom por registar aquilo que Espanha prefire deixar no silêncio e na escuridade.
Galiza Contrainfo fijo parte dumha ampla rede, mais ou menos informal, de meios comunitários galegos nascidos neste século, mantidos mormente polo trabalho gratuito e voluntário do seu pessoal, e sostidos numha ampla rede de colaboradoras: é o caso deste portal, do veterano Novas da Galiza, ou de espaços desaparecidos como Galiza Indymedia ou o Diário Liberdade.
Deste ese digital, que partilhou com Galiza contrainfo materiais, luitas e eventos populares, vai o nosso reconhecimento e agradecimento por quem acompanhárom fielmente o país mais digno e combativo em quinze anos de trabalho.
Deste ese digital, que partilhou com Galiza contrainfo materiais, luitas e eventos populares, vai o nosso reconhecimento e agradecimento por quem acompanhárom fielmente o país mais digno e combativo em quinze anos de trabalho.