Som 105 os anos que se cumprem amanhá dumha das assembleias mais relevantes de toda a história galeguista; foi em Lugo, em pleno andaço de gripe internacional em 1918, e precisamente por ser esta a cidade em que a fracçom militar do ‘provincialismo’ iniciara a revoluçom galega de 1846. A chamada “Assembleia de Lugo”, que oficializava o nome “nacionalismo” será amanhá comemorada por iniciativas populares como Via Galega, o Projeto Estreleira, ou o centro social Mádia leva.
A memória galega permanece forte e, ainda que mormente silenciada na mídia e secundarizada no ensino público, amanhá terá outra das suas citas imprescindíveis. Diferentes expressons do movimento nacionalista e independentista citam-se amanhá para recordar que, mais dum século depois da sua formalizaçom organizativa nas Irmandades da Fala, e da elaboraçom do seu primeiro programa político, a libertaçom nacional segue a tentar-se e a exigir-se. A história e os símbolos de nosso terám um peso especial em muitas localidades, de Ortegal ao Minho, mas com um peso especial da cidade de Lugo.
Via Galega
A plataforma polos direitos nacionais da Galiza retoma neste 2023 umha das iniciativas melhor sucedidas do passado ano: o içado solene da nossa bandeira (estreleira, com a simples faixa azul ou com a serea) em pontos muito diversos da geografia nacional: desde os grandes núcleos urbanos do País, até comarcas rurais como Arnoia, passando por lugares costeiros como a Marinha. Os içados, por vezes com explícito apoio dos poderes municipais, acompanham-se em ocasions de leituras de discursos ou recitais, e visam normalizar umha simbologia que está cada vez mais e mais cercada polos discursos e emblemas dumha direita espanhola radicalizada. Neste fio, as pessoas interessadas podem ver todas as localidades onde Via Galega lança a sua proposta expansiva.
Na realidade, esta “campanha expansiva”, por palavras da plataforma, pretende que “as bandeiras galegas fiquem em lugares vistosos, com o objectivo de estas perdurarem no tempo”, e desta maneira constituir umha efectiva resposta à “invasom espanhola”.
Activismo lucense com o Mádia leva
Por seu turno, o veterano centro social lucense Mádia leva nom deixa tampouco passar a data, e umha ofrenda floral decorrerá amanhá diante da porta do hotel Méndez Núñez, na Rua da Rainha, céntrico hotel em que, segundo certas fontes, decorreu a grande assembleia galeguista. Baixo a placa que comemora o importante passo dado polas figuras mais senlheiras do movimento, representantes do centro social darám passo a umha intervençom e interpretarám o hino nacional. Será no sábado 18 às 12h.
Projeto Estreleira culmina a jornada
Praticamente um ano depois da sua estreia em Portugal, com umha marcha independentista galega e portuguesa, Estreleira volta a apresentar umha campanha nacional, e fará-o precisamente o 18 de novembro e diante do Hotel Méndez Núñez, às 13h, justo depois do acto do CS Mádia leva. Estreleira organiza umha rolda de imprensa em plena rua na que exporá as ideias força dumha nova intervençom para este curso.
Segundo se informa nas suas redes sociais, a homenagem aos homens e mulheres das Irmandades servirá também para apresentar “umha nova linha de trabalho na linha republicana” que vai precisar de todo o apoio e adessom da base social galeguista e independentista, e que se fundamentará na vindicaçom da República galega e das nossas principais ensenhas nacionais.