A grande parte das análises sobre o processo eleitoral na Galiza importam o molde interpretativo de Espanha, quer dizer, tomam em conta apenas a linha divisória esquerda-direita, secundarizando a nossa questom nacional e obviando o seu peso no imaginário da populaçom. Numhas eleiçons em que a fascinaçom pola esquerda espanhola de parte do eleitorado galeguista volveu emerger, achegamos umha visom alternativa. Reproduzimos pola sua originalidade e interesse oito teses que abordam dumha perspectiva autocentrada a relaçom entre a nossa identidade e os ciclos eleitorais do presente e futuro vindouro.
1) Na Galiza estám organizados politicamente dous nacionalismos, sendo o espanhol mas influente e transversal.
2) Esses dous nacionalismos originam três eleitorados: dous de voto identificado com cadanseu nacionalismo e um neutral, este hoje mais influído eleitoralmente polo nacionalismo espanhol.
3) O nacionalismo galego está monopolizado eleitoralmente por apenas umha organizaçom: o BNG.
4) Maioritariamente, o terceiro sector (o neutral) nom vê o BNG viável eleitoralmente nas eleições gerais espanholas. É esse sector, amplo, o que há que persuadir nas autonómicas; é inútil centrar-se num irrelevante micro-sector de lealdade “de esquerda”.
5) Liderar um futuro governo autonómico é a ÚNICA chave, hoje, para tornar o soberanismo galego umha opçom permanentemente viável em todas as convocatórias eleitorais.
6) Só depois dessa fase, abre-se a possibilidade de um tempo de pluralidade soberanista (como em Euskal Herria ou Catalunha) ou de consolidaçom dum grande partido nacional estilo Escócia.
7) Tudo o anterior é umha análise estritamente eleitoral. Quer dizer, obviamente, insuficiente para descrever a realidade. Falta sociologia da estrutura social, ponderaçom da tradiçom histórica, análise prospectiva da dialéctica ideologia/praxis produtiva…
8) Por último, e também importante: Se o colapso do Estado espanhol, quer em Catalunha, quer em Euskal Herria, centralizar o debate público num grau crítico (maior do que actualmente), tudo o anterior devesse ser revisado.
*Texto publicado originariamente como fio no perfil de Felmil Joibám