Dous anos depois da sua saída à luz no panorama do pensamento e dos movimentos populares do País, o Espaço Clara Corbelhe continua a oferecer novas propostas formativas. Nesta ocasiom, e segundo anuncia nas suas redes sociais, vem de tirar do prelo o “01 Anuário Clara Corbelhe de produção crítica galega.” Umha selecçom do melhor do pensamento crítico elaborado na Galiza, e que agora a comunidade leitora pode desfrutar em formato papel.
A publicaçom, que estará ao dispor do público nos actos patrióticos do vindouro 25 de julho, compreende mais de 200 páginas em forma de livro, e contém as propostas de 21 autoras e autores, a cavalo entre o mundo académico e militante, “sobre aspectos chave da história, cultura, território e política galegas”. Todos estes artigos vírom a luz entre os anos 2021 e 2022 no Caseto de Clara Corbelhe, o espaço web no que o projecto oferece, cada quinze dias, umha reflexom de autor ou autora sobre aspectos essenciais da Galiza contemporánea. De Clara Corbelhe informam que as Caseteiras (pessoas que assinam a publicaçom e contribuem com umha quota de apoio) podem conseguir de graça o livro, e aquelas pessoas nom assinantes poderám comprá-la nas bancadas que o movimento popular pom na Alameda ou no Festigal o dia 25 de Julho.
Dous anos de intensa actividade crítica
Em apenas dous anos, o Espaço Clara Corbelhe reuniu um amplo e variado grupo de pessoas com o centro de gravidade na Galiza, parte delas ligadas ao campo académico dumha perspectiva de pensamento crítico, e umha outra procedente do mundo militante nas suas diferentes expressons. O projecto ganhara sona com um primeiro vídeo de apresentaçom, e com umha declaraçom inaugural na que apresentava “co-construir ferramentas de conhecimento, análise e intervenção desde um lugar de enunciação que, suspeitamos, temos de erguer. Um lugar que desassossegue relações e arquivos, para armar desde o materialismo e a autonomia crítica uns estudos emancipatórios galegos”.
Numha intersecçom que procura “o cruzamento entre a produção teórico-crítica e a intervenção social, e entre o trabalho intelectual-cultural e a experimentação política prática”, Clara Corbelhe pujo em andamento distintos formatos de produçom intelectual, basicamente nucleados numha revista monográfica que se edita umha vez por ano; mas a iniciativa acompanha-se de jornadas de formaçom, cursos, e palestras, “no objetivo de abrirmos novos vieiros para o pensamento crítico galego e possibilitar outros circuitos de saberes”, polas suas próprias palavras.
Número inaugural a dispor do grande público
O Espaço Clara Corbelhe tem posto na rua já dous números monográficos, dedicados às representaçons de Espanha na Galiza e ao campo intelectual do País, respectivamente. O primeiro deles está já ao acesso livre de qualquer pessoa que quiger consultá-lo na sua web, pois o projecto aproveitou a comemoraçom do dia da I República galega para brindá-lo ao grande público e aumentar o seu impacto. Polas próprias palavras do Espaço, trata-se dumha reflexom coral “sobre as manifestações dum poder que esfarelou, despojou e danou entre nós quanto lhe foi possível, em nome da ideologia do progresso e da harmonia homogeneizadora”. Se quigeres aceder à revista completa podes fazê-lo aqui.