A confluência dum caciquismo muito arraigado com umha nova direita escandalosa e populista em Ourense está a alimentar mais e mais análises na rede. A demissom de José Manuel Baltar do seu posto na Deputaçom leva a variados opinadores e opinadoras a se perguntarem se o enfraquecimento baltarista pom em risco a hegemonia eleitoral do PP na Galiza. Som muitas questons abertas para umha controvérsia ourensá que ganhou já alcanço galego.
A imprensa espanhola analisava a enorme importáncia do caciquismo ourensao e, no que à família Baltar diz respeito, anunciava a sua mais que provável queda, com todo o que supom de enfraquecimento do sector mais “autóctone” do PP na Galiza.
Para meios alternativos, a saída de Baltar, pressionado polo seu partido, pode dever-se ao interesse do PP em se apoiar na nova direita localista organizada por volta de Democracia Ourensá.
Na imprensa nacionalista, repassava-se a ampla lista de escándalos que acompanhárom a gestom de Baltar nas últimas décadas, e que nom impedírom a consolidaçom dum forte baluarte caciquil no surleste galego.
O perfil do jornalista David Lombao recorria à história para recordar como convulsons locais do PP, e as tensons entre os seus líderes rivais, acabam por ser muito decisivos na deriva final da direita espanhola na Galiza.
Para Lois Alcayde, a queda é de tais dimensons que abana umha das grandes estruturas da engrenagem que mantivo em pé a hegemonia do PP na Galiza.
Com umha perspectiva mais cauta, Xandre Garrido apontava que podemos estar ante umha estratégia que procure manter incólume o baltarismo prescindindo da sua figura mais célebre e, a dia de hoje, impopular.
Conhecidos políticos galegos recorriam à retranca para valorar o incerto futuro imediato da direita espanhola em Ourense.
Outra conta de twitter resgatava um vídeo aparentemente humorístico, mas que na realidade recolhia os primeiros momentos na política dos novos aliados do PP em Ourense, prévia aos tempos das redes sociais e do sucesso do populismo de direitas.
Outros perfis chamavam a analisar profundamente o que acontece em Ourense para entender a realidade política galega.