Se bem todo processo eleitoral tem interpretaçons em muitas dimensons, para quem entendemos Galiza em chaves nacionais, um dos feitos mais salientáveis da cita municipal com as urnas é a ratificaçom da tendência alcista do nacionalismo galego, num contexto estatal e europeu de ascenso das correntes da direita reaccionária. Assim recolhia o galituiter, o dia depois da jornada eleitoral, umha sensaçom geralizada de confiança no potencial eleitoral nacionalista.

O Nós Diario punha em destaque que o BNG superava os 250000 votos, e que tinha a possibilidade de governar em mais de trinta concelhos do País.

Ante hipotéticas alternativas autonómicas ao domínio do PP, este perfil apontava que a decadência eleitoral do PSOE é umha outra das liçons que dá a jornada de ontem.

Nesta conta de tuiter, punha-se de destaque outro aspecto importante da dinámica política galega: num contexto de auge da direita, extrema direita e bipartidismo clássico, o nosso país mantém umha lógica de seu.

Outro conhecido perfil congratulava-se da fraqueza institucional da extrema direita mais explícita.

Dumha perspectiva independentista, esta conta apontava o valiosa que resulta esta singularidade galega.

Num plano simbólico, mas que vai além do formalismo, especialmente significativo é o feito da capital do país ser governada por umha nacionalista, o que pom um ponto e aparte na história municipal da cidade nas últimas décadas.

Este perfil recordava as práticas autoritárias da polícia municipal de Bugalho no passado ano, e congratulava-se do avanço em matéria de liberdades que se iria alcançar em Compostela.

Noutras das grandes urbes da Galiza, o panorama é bem diferente. Além da vitória numérica do PP nos grandes núcleos urbanos, a hegemonia de Jácome em Ourense mereceu muitas análises e acendeu controvérsias nas redes.

Do mesmo modo que se registou um auge eleitoral do nacionalismo, a potência dos grandes partidos espanhóis é muito forte no País. Como mostra, a atitude lingüística dos seus dirigentes municipais nas três grandes urbes, como recordava este perfil.

Como todo processo eleitoral, este transcorre em condiçons de ventagismo para quem detentam o poder real. Na nossa Terra, o papel dos meios públicos na decantaçom do voto foi sempre fulcral, como lembra esta conta.

A normalizaçom do espanhol e a frequência da linguagem propagandística som notas cada vez mais dominantes na CRTVG; sobre isto último aponta-se neste perfil.

Dumha perspectiva independentista, assinalava-se também no galituiter o problema que supom a legitimaçom de fundo dos processos eleitorais num Estado como o espanhol.

Embora o quadro autonómico faga por vezes esquecer que a Galiza continua além dos limites da CAG, nesta conta apontava-se a necessidade de enxergar o país inteiro.

E a seguir, oferecia-se umha síntese dos resultados eleitorais na grande comarca do Berzo.