Temos informado recentemente neste portal como o desenvolvimento de amplos espaços verdes nas urbes pode ser umha das medidas defensivas mais importantes contra a mudança climática, segundo analisa e propom o movimento ambientalista.

Em consonáncia com este argumentário, Ecoloxistas en Acción vem de se entrevistar com várias forças políticas do sul da Galiza para pedir a inclusom desta estratégia nas acçons de governo municipal.

Na apresentaçom da sua campanha, Ecoloxistas en Acción vincam que o arvoredo urbano é fundamental como “espaço de conexom com o natural na cidade”, e defendem que há umha provada relaçom entre árvores, saúde mental e qualidade de vida. Mas para tal cousa, as capitais urbanas precisariam “arvoredo saudável, com grandes copas, e com um sistema radicular forte e equilibrado.”

Ineptidom institucional

Na opiniom do colectivo ambientalista, “a má gestom das zonas verdes em muitas das nossas vilas e cidades nom permite que haja árvores de qualidade, provocando umha perda importante dos benefícios que achegam as árvores”; por trás de tal facto, segundo a organizaçom, acham-se “modelos de gestom baseados em conceitos antiquados e pseudocientíficos, gerando danos irreversíveis e arruinando o património natural urbano, incrementando o custo de mantimento e aumentando as incidências.” Como exemplo de nefasta gestom do espaço natural urbano, Ecoloxistas en Acción tem assinalado umha e outra vez o comportamento “arvoricida” da corporaçom que dirige Abel Caballero.

Implicaçom social

Apesar de se mostrar enormemente dura com a maior parte da gestom municipal das zonas verdes na Galiza, Ecoloxistas en Acción acredita na importáncia de manter a interlocuçom com todos os agentes políticos institucionais, com o objectivo de “tomarem consciência, dumha vez por todas, da dependência insondável que temos da natureza e (…) da necessidade primária de todo ser humano de estar em contacto com ela”.

Com este intuito, umha delegaçom do colectivo vem de se entrevistar com diferentes candidaturas municipais viguesas, como BNG ou En Marea. A ideia é estas incluirem as linhas de acçom pro-arvoredo na sua intervençom governamental ou, no caso de nom governarem, de integrar este argumentário na dinámica de oposiçom.

Para além de candidaturas, Ecoloxistas também se decidiu a entregar um manual com as suas teses a alguns concelhos da zona periurbana de Vigo, nomeadamente no Vale Minhor e Lourinha. Porrinho, Redondela, Baiona, Gondomar e Nigrám tenhem ao seu dispor as linhas mestras do que iria constituir umha forma singela e directa de combater os efeitos do quecimento global na nossa Terra.

Manual orientador

Com bases científicas e profissionais, Ecoloxistas en Acción vem de dar a lume um manual com vocaçom eminentemente prática que pretende “rever conceitos, actualizar objectivos e unificar critérios de actuaçom” que homogeinizem a acçom para todas as vilas e cidades galegas. A ideia de fundo é construir umha “infraestrutura verde que alimente umha cidade mais resiliente e sostível”.

Sinalan que unha cidade cunha Infraestructura Verde ben planificada e xestionada vólvese máis resiliente e sostible. Ao longo da súa vida, as árbores proporcionan un conxunto de beneficios moito máis valiosos que a inversión en plantación e coidado.

As pessoas interessadas em descarregar ou espalhar este manual podem fazê-lo aqui.