Venho de participar no Programa de Conhecimento de Realidade (PCR) que organiza Enxeñería Sen Fronteiras Galicia (ESF) Trata-se dumha experiência de sensibilizaçom que potência a aprendizagem das pessoas da nossa sociedade através do conhecimento de primeira mao das desigualdades entre países. Procura-se que as pessoas participantes adquiram conceitos, procedimentos e atitudes como parte do processo de afundamento nas causas das desigualdades no mundo e que interiorizem nas suas vidas e no seu entorno atitudes de câmbio social para superar a injustiça social.
Desde ali os PCRs aproveitamos para relatar a nossa experiência, aqui tendes um extracto:
“Fôrom dias intensos. Recebemos a visita do movimento Via Campesinha, do que forma parte o Sindicato Labrego Galego, e com elas fomos visitar aos produtores de APROEM (Associaçom de Produtores Ecológicos de Moropocay), que compartírom com nós a sua situaçom atual e os seus projetos, como a investigaçom e desenvolvimento de diferentes tipos de sementes de milho, para lograr plantaçons mais resistentes a pragas, furacáns, secas… visitamos umha plantaçom de milho selecionado, que precisamente batizárom “Aproem”. Conhecer o projeto, e às pessoas que o levam avante, foi umha aprendizagem magnífica.
Também visitamos um projecto de restauraçom ecológica em Namasigüe, um lugar mui bonito e um projeto mui interessante. Coincidimos também com o presidente de CODDEFFAGOLF, dom Modesto, umha pessoa que paga a pena conhecer. Foi um encontro coa associaçom Nadin, um dos coletivos que se ocupa do dragado das canles da zona, onde pudemos ver umha parte interessante e delicada da gestom do projeto. O objetivo deste é o dragado das canles para que a água circule de novo, permitindo renascer os mangrares da zona e produzir de novo camarom. O dragado fai-se a mao, com este sol incessante, o mérito é infinito.
À sua vez, esta repovoaçom responde à compra de bonos de carbono por parte das empresas contaminantes (que, mediante a aquisiçom dum bono de carbono, obtenhem o direito a emitir umha tonelada de dióxido de carbono).
Como dixemos, todos estes projetos som levados avante por CODDEFFAGOLF, coparte local de ESF, e principal organizaçom coa que os PCRs estamos a colaborar aqui. É umha organizaçom experimentada, pois nasceu em 1988, e o seu objetivo é promover umha gestom eficaz e sustentável da biodiversidade nos espaços naturais e protegidos, coa participaçom ativa das comunidades, dos governos locais e da povoaçom em geral. Levam avante acçons de distinto tipo, como a gestom de espaços naturais, acçons para o desenvolvimento socioeconômico local, fortalecimento de grupos de base, consecuçom de influência política. Eles ajudam-nos a enfocar o nosso rol nesta experiência, combinando os nossos conhecimentos e interesses coas suas necessidades.
Também tivemos a celebraçom do aniversário do ESF! Foi umha festa galego-catracha mui entretida, na que participou o pessoal das principais sócias de ESF de aqui, CODDEFFAGOLF, AJHASA e NASMAR, e na que se podia escolher entre torta de patacas, catrachas (torta de milho frita à que se adiciona umha capa de feijons, queijo…) e sangria.
As fins de semana aproveitamos para fazer excursons a Amapala, Sam Marcos de Colom ou às termas de Nacaome (que se originam por tratar-se dumha zona vulcânica).
Chamou-nos a atençom que aqui a terma mais cara era a fria! Tampouco se acostuma levar roupa de banho, empregam-se pantalons curtos e camisola. Certo que assim mantem-se o fresco mais tempo…
Também provamos o karaokê, e a classe de punta, um género de baile e música afroindígena originado pola etnia garífuna de San Vicente. De momento creio que ainda temos que praticar…
O domingo participamos na reuniom geral da Rede JAC (Juventude em Acçom polo Clima), onde se abordárom questons como a organizaçom interna ou a realizaçom de atividades previstas para as seguintes semanas. Em resumo, mui contentas com todo o que estamos a aprender”.
Seguiremos informando!