Esta quer ser umha pequena crónica musical, mas também umha chamada à arte que se impulsiona desde os centros sociais autogeridos e, que à sua vez esta os impulsiona a eles, retroalimentando-se, arte que é expressom genuína desde o conflito, desde o prisma das de abaixo.
Estes grupos e pequenos concertos som exemplos de arte viva que, de Norte a Sul do país e situando a música e os espaços autogeridos como o centro (e nom o negócio), nom podem mais que ganhar-se a simpatia e abrir os ouvidos para as ânsias da liberdade dos povos. Um exemplo desta arte juntou-se no “Apóstolo punk”. Arredor dum cento de pessoas, nuns concertos que competiam nas datas com eventos como o Resurrection Fest e umha cheia de festivais, e juntou-nas no centro social A Gentalha do Pichel, o maior epicentro compostelám da nossa cultura.
Na sala, umha mesa com o material dos distintos grupos e umha compra-venda de vinilos, camisolas e cd´s, compartindo também em irmandade os materiais entre os grupos musicais: desde Portugal, Falcata; desde Euskal Herria, Streetwise; e fazendo de anfitrions-organizadores, o grupo recentemente criado, Crise.
Crise, punk-rock bem fresquinho, com membros de Impulsos criminais, Dandy fever e Fred and the perrys, deleita com as suas letras entre a memoria histórica e o existencialismo. Fecham o seu direto cumha versom do mítico grupo Kortatu: “ya va siendo hora de que empiece a arder”.
Jovens de entre 20 e 25 anos som os Streetwise. Umha joia de grupo com muito futuro por diante. Abertzales e antifascistas que se apresentam afirmando que: “temos algo em comum, ninguém daqui é espanhol”, pulando na sua simbologia pola liberdade das presas políticas e deleitando a gente coas suas letras combativas.
Falcata, desde Lisboa, quarteto com seis anos de experiência, tendo formado parte de outras bandas com força em Portugal. Apresentam-se como Rock´n Oi. Inês Estiveira, única mulher que atuou nos concertos, por desgraça, deixou a todas impressionadas com a sua guitarra. Irmandade entre povos foi a inspiradora proclama deste grupo.
Grandes grupos todos eles como grande o centro social, A Gentalha do Pichel, que está a celebrar durante estas semanas a sua Universidade Popular de verão.