Boa parte dos movimentos sociais do País toparám-se de novo arredor do desporto. Será nos vindouros dias 10, 11 e 12 de junho no parque recreativo e desportivo da Seca, em Poio, numha nova cita das Olimpíadas Populares Galegas. A cita suporá a oitava ediçom desta convocatória aberta que nasceu em 2011 para fomentar o convívio entre distintas iniciativas populares da Galiza, e para fazê-lo com a defesa do exercício nom mercantilizado e em contacto com a natureza. Desta volta, a organizaçom Pontevedresa O Quilombo responsabilizou-se pola organizaçom do evento.
As Olimpíadas Populares Galegas figeram a sua estrea na Primavera de 2011 no Ribeiro, para irem circulando em anos seguintes polas comarcas de Compostela, Arnoia, Baixo Minho, Morraço, Terra Chá e Terra de Montes. Com parons pontuais em 2015 e 2017 e o parom obrigado dos últimos dous anos, devido a situaçom sanitaria, estes particulares jogos olímpicos do movimento popular congregárom boa parte dos centros sociais do País, organizaçons juvenis, ecologistas e o tecido associativo que se move à sua volta. Com umha organizaçom autogerida semelhante à que guia o dia a dia dos próprios movimentos sociais, as Olimpíadas servem também para tomar um respiro no ritmo de vertigem que domina as nossas vidas, e confluir durante um fim de semana num espaço natural, desvinculados de ecrás e realidades virtuais, para praticar um desporto diferente: longe da obsessom polos registos, os materiais ou as imagens. Um desporto nom muito diferente do que, como jogo popular, praticou o povo galego antes de cair baixo as pautas do espectáculo.
Variedade de provas
Os e as participantes nas OPG terám um amplo leque de provas que escolher: as modalidades atleticas estám presentes, com salto de longitude, carreiras (100 e 5000 metros) ou triatlo; haverá desportos de equipa como balom voleia ou brilê; também provas da nossa tradiçom como luita galega, a chave ou bilharda e jogos populares como tiro de corda, lançamento de sacho. Mesmo as pessoas pouco aficionadas ao exercício físico terám a sua ocasiom de participar nos jogos com disciplinas como o jadrez ou lançamento de boina. Todas as provas, horários e demais informaçom pode ser consultada nos documentos que estám a circular nas redes sociais e blogues dos movimentos sociais.
Equipas
Segundo o regulamento das OPG, um colectivo pode constituir a sua equipa com um número mínimo de cinco pessoas, máximo de 16 e deve participar alo menos de três provas. A inscriçom pode ser feita até 2 de junho e dá dereito a participaçom nas provas com a cobertura de seguro de acidentes, 2 dorsais de atleta por participante, almorço da manham de sábado e domingo, acampada e uso de zona camper para caravanas e carrinhas todo o fim-de-semana, uso de banhos, duchas e vestiarios e acesso a inscrever-se nas comidas. O comitê olimpico facilita um formulário em linha no que indica as instruçons para cubri-lo e alcançar umha participaçom equilibrada e o e-mail olimpiadaspopularesgalegas@gmail.com para resolver dúvidas. As Olimpíadas estreárom-se há sete anos com a vitória de Siareiras Galegas e na última ediçom o CS Faísca alçou-se com o trofeu.
Podes descarregar aqui a informaçom e documentaçom precisa.