Este ano o aniversário do histórico concerto no Burgo das Naçons, em Compostela, que passou à história como a primeira vez em que a Grândola, Vila Morena era cantada ao vivo, contou com duas atividades especiais para lembrar esta data.
Em primeiro lugar, na semana do 25 de Abril foi apresentado o documentário elaborado pola produtora Xarda com a colaboraçom de Nós Televisión em que também colaborou AJA-Galiza. O sábado 8 de Maio na Gentalha do Pichel organizárom, junto coa Xarda, umha projeçom ao vivo. Após a visualizaçom, o público deixou un interessante colóquio conduzido por Elena Martín e Pablo Santiago, realizadores do documentário, e Odilo González, da AJA-Galiza. Um colóquio que permitiu também achegar novos dados e resolver muitas dúvidas.
O domingo 9, na véspera do 49 aniversário do histórico concerto, sob a legenda “Vozes da Liberdade”, lembrárom as figuras de Benedicto, principal impulsor daquele concerto, e José Afonso como umha metáfora das relaçons entre a Galiza e o Portugal antifascistas, que perduram até hoje.
Ao ato assistiu umha representaçom de várias geraçons da família de Benedicto Garcia e mesmo de achegados ao José Afonso vindos desde Portugal. Interviu em primeiro lugar a concelheira de Acçom Cultural, Mercedes Rosón, que lembrou que ainda existe umha dívida com o Benedicto na cidade. Também estavam presentes membros da cámara municipal de Compostela Aberta e do BNG.
Depois Odilo González, Presidente da AJA-Galiza, interviu lembrando a importáncia histórica daquela amizade entre Benedicto e José Afonso que se mantivo toda a vida e que achegou Galiza e Portugal cultural e politicamente. Episódios vitais que falam da necessidade destas relaçons e das luitas pendentes contra o fascismo e pola liberdade.
Depois da oratória, a voz e a música de Falua encheu de novo o Burgo das Naçons de irmandade, desde a Galiza passando por Portugal ou Cabo Verde.
Para rematar a ato deslocárom-se ao pátio, onde inicialmente estava previsto realizar o encontro, para inaugurar o mural realizado pola AJA-Galiza para a ocasiom e que pretende achegar às geraçons presentes e futuras de estudantes aquele feito e os valores que cantavam. Um mural de 13 x 2,5 metros inspirado numha fotografia do concerto de vários cantores no Paço de Bendanha no ano 73, no que José Afonso e Benedicto compartírom cenário e microfone. No mural colocou-se umha placa que referência àquele concerto de 10 de maio de 1972 no Burgo, ao Grândola e à relaçom dos dous geniais cantores. Duas geraçons encarnadas por Maite Angulo e Nicolás Nistal, companheira e neto do Benedicto, fôrom as responsáveis de descobri-la.
