O pessoal temporal do Consórcio filiado á CNT decidiu em assembleia por ampla maioria convocar greve para defender os seus postos de trabalho após o anúncio da oferta de emprego público da Junta do passado Dezembro.

A greve convocada por CNT terá carácter indefinido no tempo. Inicia-se hoje 30 de Março de 2021 e prolongará-se cada terça-feira em semanas alternas. A greve tem como objetivo regularizar a situaçom de todas as trabalhadoras temporais em fraude de lei e abuso de temporalidade independentemente da forma de acesso ao seu posto (oposiçom, listagens, subrogaçom,…) toda vez que a Junta de Galiza vem de incluir a prática totalidade das vagas na última oferta de emprego público (OPE) a finais de 2020.

Todo o pessoal pertencente às escolas infantis da Galinha azul, centros de dia, fogares residenciais e todos os centros de trabalho da rede do Consórcio Galego de Serviços de Igualdade e Bem-Estar, incluindo o pessoal de serviços centrais, está chamado à greve. Esta situaçom é responsabilidade plena da Administraçom que, a dia de hoje, continua a desouvir as petiçons de reunions realizadas pola CNT quanto às reivindicaçons da greve.

A CNT transladou a sua total oposiçom ao decreto de serviços mínimos imposto pola Junta de Galiza para a greve no Consórcio de Igualdade e Bem-Estar por considerá-la arbitrária, desproporcionada e falta de motivaçom. A central sindical entende que com este decreto de serviços mínimos nom queda garantido o legítimo exercício do direito à greve do conjunto do pessoal que trabalha para o Consórcio.

Seguimento

As primeiras valoraçons de CNT sobre o seguimento da greve fôrom mui positivas. Polos primeiros dados deste mesmo dia, confírma-se que som numerosas as trabalhadoras que estám a secundar a greve na maioria dos centros de trabalho do Consórcio, a pesar do abusivo dos serviços mínimos impostos pola Junta da Galiza que abrangem a metade do quadro de pessoal.

Do sindicato informam dumha importante participaçom do pessoal temporal na greve, praticamente total nos serviços centrais e na rede de residências e centros de dia, com umha maioria de centros onde nom se pudo dar o serviço. Também há um amplo seguimento na rede de escolas infantis ainda que com dados de participaçom mais desiguais

O comité de greve insta á Gerência do Consórcio a que faga públicos o desglosse dos dados de seguimento pola tipologia do pessoal e que indique todos os centros onde nom se pudo dar serviço.