Mais um caso de transfuguismo outorga ao PP umha alcaldia na província de Ourense, a terceira em só duas semanas. Após os casos de Castrelo do Minho e Viana do Bolo, protagonizados por concelheiros que pertenciam ao PSOE, chega o de Sam Joám de Rio. Xosé Miguel Pérez Blecua, que se apresentara como cabeça de lista dumha «agrupaçom de eleitores», focou parte da campanha para chegar à cámara municipal precisamente em evitar que governasse o PP. Porém, leva desde o dia 24 militando no partido espanholista.
Este caso é especialmente grave, toda vez que Blecua tem militado no independentismo galego. No seu dia o agora alcaIde do PP pertenceu à AMI e a Causa Galiza. Aliás, durante a legislatura 2007-2011 foi concelheiro do BNG, lista na que ocupou o segundo posto.
Nas eleiçons municipais do 26 de maio de 2019 a «agrupaçom de eleitores de Sam Joám de Rio» tivo maioria absoluta, com 191 votos (o 51.21 %) e 4 concelheiras, frente aos 2 do PP —111 votos (o 29.76 %)— e ao único do PSOE —70 votos (o 18.77 %)—.
O anterior alcaide da vila, Luis Castro Álvarez, também se uniu ao PP no meio da legislatura, neste caso abandonando o PSOE.