A migraçom como síntoma da colonizaçom 

Esta semana está a celebrar-se em Compostela o Talentia Summit´19, um foro que tem como objetivo o descobrimento de talentos. Nele, mais de um cento de empresas estám a procurar por mao de obra qualificada para incorporar às suas estruturas. Além desta finalidade, o foro também terá umha funçom doutrinadora, pois contará com umha ampla série de conferências e cursos onde louvar a ideologia liberal do progresso individual e da meritocracia. Um dos palestrantes declarava ontem: “A tecnologia compra-se, a vantagem competitiva está em dispor de um equipo humano comprometido” em alusom ao chamado salário emocional.

Ainda que também há empresas galegas, a maioria som multinacionais com sede social fora da Galiza. Este tipo de jornadas contribuem a que novas caravanas de moços e moças qualificadas emigrem e se somem aos mais de médio milhom de pessoas que marchárom do País durante as duas últimas décadas, das que quase a metade delas tinham entre 16 e 34 anos.

Umha colónia

Se bem existem casos de emigraçom onde o motivo pode ser formoso, como pode ser a solidariedade internacionalista, onde podemos tomar como exemplo o caso recente de Baran Galiza, quem deu a vida luitando pola liberdade do kurdistam, estes som apenas excepçons.

No caso galego, durantes as últimas décadas o motivo principal é a precária situaçom económica e a falta de emprego. A causa? O papel que Espanha e o Capital lhe tenhem assignado a Galiza é o próprio de umha colónia, umha terra de onde tirar os recursos que precisa para o seu crescimento económico: matérias primas baratas, fontes de energia, mas também mao de obra.

E se durante muito tempo os migrantes galegos apenas tinham os estudos primários, hoje já nom é assim. Hoje umha parte importante da juventude galega que decide emigrar está altamente qualificada. E se já é dramático qualquer migraçom, a marcha de gente nova qualificada supom umha perda enorme que nenhuma naçom pode suportar durante muito tempo, pois com ela marcha também o esforço que tivo que fazer o conjunto da sociedade por formá-la. E com ela marcha também umha parte importante das possibilidades de liberaçom do País. O próprio feito de nom emigrar e ficar na Terra é já um ato de resisténcia.

Os dados

Desde o ano 1999 mais de 240 mil moços e moças galegas colhérom as malas e pusérom rumo ao estrangeiro. O motivo principal, nomeadamente na franja de 25 a 34 anos, é a procura de umha saída laboral que demonstra que o máximo da série histórica coincidiu com os anos mais duros da crise económica: de 2007 a 2013. Podem-se ver os dados com detalhe na tabela final.

Migraçom externa