Este fim de semana há umha nova cita para o movimento popular galego. A Agrupaçom de Montanha ‘Augas Limpas’ (A.M.A.L.) em colaboraçom com a associaçom cultural da Marinha Xebra! organiza um novo roteiro polos montes do País, nesta ocasiom trata-se do roteiro de outono que decorrerá pola Serra do Xistral.
Caminho ao cúmio do Xistral
O próximo Sábado, dia 1 de Dezembro, a agrupaçom de montanha pretende ascender ao Cadramom, a principal cima da Serra do Xistral, a 1.052 metros de altitude sobre o nível do mar. É um roteiro dum só dia, e com umha duraçom aproximada de 5 horas para percorrer arredor de 12 quilómetros, polo que é classificado pola organizaçom como de dificuldade média.
Quem deseje participar do roteiro, deverá presentar-se às 9:30 da manhá do Sábado diante da casa do Concelho de Abadim. Desde a organizaçom recomendam levar calças impermeáveis e polainas, por se houvesse neve. Além disso, é imprescindível ir ao roteiro com bom calçado e roupa de abrigo, comida, e bebida para a jornada. É preciso confirmar a ssistência escrevendo para aguaslimpas@riseup.net
Desporto para conhecer a Terra
Desde o ano 2005, A.M.A.L. realiza um labor de conhecimento da natureza galega e de denúncia das agressons ambientais que sofre o território galego. Esta agrupaçom de montanha toma o nome do último acampamento guerrilheiro que houve na Galiza, nos Montes do Invernadoiro.
Este tipo de jornadas de convívio, que aunam prática desportiva, formaçom e contato com a natureza, apoiam-se em umha tradiçom que começou na Galiza com o grupo juvenil Ultreya, quem realizou as suas primeiras jeiras de convívio em Março de 1932 na conhecida Missom Biológica de Galiza.
Para criar consciência nacional é preciso primeiramente conhecer o território que conforma a Naçom.