Por José Manuel Lopes Gomes /
Afeitos como estamos a duras luitas e agressivos ataques do poder, nom estamos afeitos a noticiar celebraçons. Mas as boas notícias existem e servem para afortalar os ánimos do movimento popular. Assi o entende a Associaçom pola Defesa da Ria de Ponte Vedra, que convoca a populaçom a umha concentraçom e festa no vindouro domingo na boa vila. O motivo, o encerramento de Elnosa em Louriçám.
O presidente da veterana associaçom, Antón Masa, anunciou que se pretende inçar o centro da cidade com laços verdes, símbolo dum futuro de respeito da natureza em Ponte Vedra. A convocatória coincide com o fim da concessom dos terrenos de domínio marítimo terrestre que ocupam as poluintes instalaçons da cloreira. O seu feche culmina décadas de trabalho sostido do movimento social na cidade e na Galiza inteira. Deixando claro que há motivos para o júbilo, o colectivo dará continuidade ao dia com umha festa na sala Karma.
A luita nom cessa
Porém, a ninguém se escapa que o grande emblema da eucaliptizaçom galega, Ence, continua aberta. A prórroga de 60 anos que, de maneira fraudulenta, o governo do PP conseguiu em 2016, pode ser revocada com acçom combinada na rua e tribunais. Isso é o que pretende transmitir a APDR com a campanha que começa no dia 29, com a legenda ‘Anulaçom’.
A associaçom confia que o novo executivo do PSOE revise a prórroga do PP por via administrativa, o que suporia um passo de gigante para a recuperaçom dumha das nossas rias mais senlheiras. A correlaçom de forças institucionais e a capacidade de pressom do movimento popular serám chaves nestes meses vindouros.