Por Antia Seoane /

Som muitos os atos reivindicativos e festivos que desde as diferentes organizaçons nacionalistas se estám a preparar para os dias 24 e 25 de Julho com motivo da celebraçom do Dia da Pátria, mas entre os abundantes eventos previstos, a prática totalidade deles celebraram-se na capital do País. Este é o motivo polo que desde os locais sociais de Vigo estám a trabalhar para organizar umha ruada independentista que terá lugar o vindouro 14 de Julho Deste jeito pretendem descentralizar as celebraçons e que o Dia da Pátria chegue também à sua cidade.

III Ruada da Pátria

Três centros sociais de Vigo, a Revolta do Berbés, o Faisca e a Asociaçom Cultural Arrulique, decidirom organizar um ano mais umha ruada independentista para visibilizar entre as vizinhas e vizinhos da cidade a celebraçom do Dia da Pátria e reclamar a independência para Galiza. Esta seria já seria a terceira ediçom que se celebra, e a jornada, além do seu caráter político, apresenta-se festiva pois contará com diferentes concertos de música do País.

Esta semana as ruas da cidade espertarom com abundosa sinalizaçom anunciando o evento e reclamando a independência para Galiza. Em umha cidade onde o espanholismo penetra incluso entre as classes mais populares e o galego apenas se ouve nas ruas, som importantes os atos que visibilizem que ainda existe um povo que se nega a ser assimilado. E é sempre nos setores da populaçom mais organizados e mais comprometidos onde abrolham este tipo de iniciativas.

O evento terá lugar na Praça da Pedra, e arrancará às 17.00 da tarde com a elaboraçom de um mural comemorativo. Desde a própria praça, às 20.00 do serám, arrancará a rondalha polas ruas do casco velho da cidade e umha vez de volta na praça, começarám os concertos de Gabi Vacaloura, O Leo i Arremecaghona e o grupo de hip-hop Son da Rua.

Antessala do Dia da Pátria

Entre os abundantes atos previstos para os dias 24 e 25 de Julho, desde este portal informativo destacamos e chamamos a participar daqueles que tenham umha clara cor arredista:

  • Cadeia Humana pola Liberdade organizada por Ceivar, que arrancará às 18.30 horas do dia 24 desde a Praça de Galiza.
  • Marcha da mocidade pola independência, organizada por organizaçons juvenis e estudantis (Erguer, Isca e Briga), que partirá ás 20.00 horas do dia 24 desde a Alameda de Compostela.
  • Manifestaçom independentista sob a legenda “A independência é o único caminho” convocada por Causa Galiza e que arrancará às 12.30 horas do dia 25 desde a Alameda de Compostela.