Por Antia Seoane /
O movimento feminista reuniu por volta das 15 mil pessoas, a maior parte delas mulheres, na manifestaçom nacional que encheu este domingo as ruas de Vigo numha jornada reivindicativa onde se reclamavam os diretos das mulheres. Umha extraordinária mostra de força prévia à histórica greve feminista que o movimento feminista galego tem convocada para o vindouro dia oito de março, Dia Internacional da Mulher Trabalhadora.
Como o lema “Para transformar a vida das mulheres”, o movimento feminista mostrou a sua energia numha das maiores mobilizaçons feministas que se lembra no País para denunciar a desigualdade e discrimaçons que sofrem as mulheres por questons de gênero. A manifestaçom arrancou às 12 da manha e recorreu as ruas mais cêntricas de Vigo onde milheiros de feministas berraram pola igualdade. A marcha finalizou na Praça do Berbés onde se procedeu à leitura do manifesto, e onde se celebraram numerosos atos ao largo da tarde. A mobilizaçom contava com o apoio de centos de coletivos feministas de todo o País, além de sindicatos, partidos políticos e coletivos LGBTI.
No manifesto lido ao final da marcha, denunciou-se a discriminaçom laboral que padecem as mulheres e que se manifesta na fenda salarial ou no teito de cristal, e também se denunciou a violência machista. Por ultimo, também se fez um chamamento a participar na greve feminista da vindoura quinta-feira. Umha greve laboral, de cuidados, estudantil e de consumo, e inclui a todas as mulheres seja qual for a sua procedência, a sua classe, a sua idade ou a sua identidade de género.
Além da greve há convocadas mobilizaçons em 25 vilas galegas:
A Corunha: Manifestaçom com saída às 19h do Obelisco.
Compostela: Concentraçom às 12 na Praça Roxa e às 20h manifestaçom desde a Praça 8 de Março.
Lugo: Ruada noturna. Saída às 20h do Multiusos da Junta.
Ourense: Manifestaçom. Saída às 20h desde a Subdelegaçom do Governo.
Vigo: Às 12h concentraçom na Rua do Principe e às 20h manifestaçom desde a Praça de Portugal.
Marim: Manifestaçom com saída ás 20:30h da Casa do Concelho.
Ferrol: Manifestaçom com saída ás 20h da Praça Amada Garcia (edifício da Junta).
Monforte: Manifestaçom com saída ás 20h da Praça de Espanha.
Cangas: Concentraçom às 12.30h na Praça do Concelho e às 20h manifestaçom.
Vilalba: Concentraçom desde as 11:30 até as 21h na Praça da Constituçom.
Ponte-Vedra: Concentraçom de 12:00 a 14:00 na Praça da Peregrina.
Ponte-Areias: Concentraçom às 12.00 na Praça Bugalhal.
Ribeira: Concentraçom às 20h na Praça do Concelho.
Cee: Concentraçom às 20:00 na Praça 8 de Março.
Redondela: Concentraçons con leitura de textos às 12 e às 19h na Praça da Constituçom.
Alhariz: Concentraçom a partir das 12:30 na Praça Maior.
Chantada: Concentraçom às 12.00 na Praza de Galicia (Julgado).
Ribadeu: Viagem comum Ribadeu-Burela no comboio das 15:00.
Viveiro: Viagem comum Viveiro-Burela no comboio das 17:00.
Burela: convívio e actividades no local da Asociaçom Xebra a partires das 16:00. Marcha de mulheres às 19:30 desde a estaçom de comboios. Concentraçom na Praça da Marinha ás 20:00.
O Barco de Valdeorras: Concentraçons às 13:00h e às 20:00h na Praça do Concelho.
Verim: Concentraçom às 20h na Praça do Concelho.
Vila-Garcia: Concentraçom às 20:00 na Praça de Galiza.
Moanha: Concentraçom às 12:30 e às 20h na Praça do Concelho.
A Ilha de Arousa: Marcha pola igualdade real entre mulheres e homens! Saída da lota às 18:00 horas até o concelho. Encamba o teu mandil e “sapateamo-lo” ao final da marcha. Leitura de manifesto e cançom “O Verdegaio”. Traz instrumentos musicais ou ferramentas de trabalho para fazer-nos ouvir.